තිත්ත නිරෝධායනයේ ඇත්ත
කොරෝනා වසංගතය හමුවේ නිරෝධායනය වඩාත් සාකච්ඡාවට බඳුන් වූ මාතෘකාවකි. වර්තමානයේ වඩාත් ම උපහාසයට ලක් වූ මාතෘකාව බවට ද නිරෝධායනය පරිවර්තනය වී තිබේ. ඊට හේතුව නිරෝධායන වැඩපිළිවෙළ තුළ සිදුවන විවිධ අක්‍රමිකතාවන් ය.
කොරෝනා වසංගතය ව්‍යාප්ත වීම හමුවේ නිරෝධායනය තුළින් රජයේ අභිලාසය වන්නේ රෝගය ව්‍යාප්ත වීම මර්දනය කිරීමයි. ඒ සඳහා රජය බොහෝ පිරිවැයක් වෙන් කොට තිබේ. නමුත් මෙහි ඇති ගැටලුව එකී පිරිවැය සැබවින් ම රෝග ව්‍යාප්තිය මර්දනය කිරීමට යොදා ගන්නේ ද යන්නයි. මුල් කාලයේ නිරෝධායන වැඩපිළිවෙළ ඉතා ම සෞඛ්‍යාරක්ෂිත ව හා පිළිවෙළට සිදු වූ නිසාවෙන් කොරෝනා පළමු රැල්ල සැලකිය යුතු මට්ටමකට මර්දනය කිරීමට රජයට අවස්ථාව ලැබුණි. නමුත් දෙවන රැල්ලේ ආරම්භයත් සමඟ නිරෝධායන වැඩපිළිවෙළ සහමුලින් ම කනපිට පෙරලුණි.
නිරෝධායන නීති රීතී එදා වේල සරිකර ගෙන ජීවත්වන මිනිසුන්ට දඩුවමක් විය. නීතිය සියල්ලන්ට ම සමාන විය යුතුය. නිතී ඉටු කරනවා යැයි කියන ආයතන සත්‍ය ලෙස ම මැදිහත් වන්නේ නිරෝධායන නීති සැබෑ ලෙස ම කඩ කරන්නන්ට ද යන්න පසුගිය දිනවල සමාජ ජාලා මාධ්‍ය තුළින් පැහැදිලි ව ම පෙනෙන්නට තිබුණි. ඇති හැකි අය පොදි බැදගෙන විනෝද චාරිකා ගිය අතර නැති බැරි අයට තම ජීවිකාව කර ගෙන යාමට පවා නිතීයෙන් තහංචි පැනවුණි. එහි ප්‍රතිඵලය වර්තමානයේ ඇස් පනා පිට ම දක්නට ලැබේ.
අනෙක් අතට, මුල් කාලයේ ආශ්‍රිතයින් පවා නිරෝධායන මධ්‍යස්ථාන වෙත යොමු කළ ද පසු ව අසාධ්‍ය නොවන රෝගීන් නිවෙස්වල තැබීමට තීරණය කොට ඇත්තේ වැඩිවන රෝගීන් හමුවේ නිරෝධායන මධ්‍යස්ථාන පවත්වා ගෙන යාම අසීරු කටයුත්තක් බැවිනි.
නමුත් මෑත කාලයේ අසන්නට ලැබෙන්නේ ඇතැම් රෝගීන්ට පවා ප්‍රතිකාර මධ්‍යස්ථානක් නොමැති ව සිටිය දී ස්වයං නිරෝධායනයට ලක් කළ යුතු ව තිබූ පිරිස් පවා මධ්‍යස්ථාන වෙත රැගෙන යාම ය. ඒ පිළිබඳ ව ආරංචිය ලැබුණු විට ම පොලීසිය නීතිය ක්‍රියාත්මක කර තිබුණේ ද නැත. ගැටලුව ඇත්තේ වරදට වඩා වරද නිවැරැදි කළ ක්‍රමය තුළයි.
නිරෝධායනයට යොමු කිරීම අධිකරණය ලබා දෙන දඩුවමක් නොවේ. නමුත් අයෙකු අධිකරණ නියෝග මත බන්ධනාගාර ගත කරන්නේ නම්, පවතින තත්ත්වය මත එම සැකකරුවෝ නිරෝධනය සඳහා යොමු කෙරේ. ඒ පිළිබඳ ව නිසි අවබෝධයක් නොමැති පිරිස් එයට විවිධ අර්ථකතන ලබා දුන්හ.
නූතනයේ ක්‍රියාත්මක වන සංචරණ සීමාවලින් සැබෑ ලෙස ම කොරෝනා මර්දනයට දායකත්වයක් ලැබේ ද යන්න ගැටලුවකි. සංචරණ සීමාවලින් අපේක්ෂා කරන්නේ අත්‍යවශ්‍ය සේවා සඳහා පිටත් වීම වුවත්, අත්‍යවශ්‍ය සේවා හැරුණු කොට අන් සියල්ලක් ම සංචරණය කරයි. එවැනි තත්ත්වයක් මත සංචරණ සීමා පනවා තැබීමෙන් කිසිදු ඵලක් නොමැත.
No comments:
Post a Comment